Час будаўніцтва надзвычай арыгінальнага па архітэктуры і мастацкім афармленні палаца невядомы. Пастаўлены палац на ўзвышшы, сярод векавых ліп, якія па перыметры акалялі ўсю сядзібу разам з пладовым садам. Такая кампазіцыя паркавага ансамбля ўскосна сведчыць, што палац быў пабудаваны не пазней чым канец XVIII ст. Ён захаваўся да сённяшняга дня дзякуючы таму, што ў ім знаходзілася раённая бальніца. Гэты гістарычны аб'ект з'яўляецца адным з самых старажытных пабудоў на Брэстчыне. Ён цалкам захаваў свой архітэктурны выгляд і менш за іншых пацярпеў за апошнія два стагоддзі. Палац у плане мае форму выцягнутага прамавугольніка. Збудаваны ён на высокім падмурку. Уяўляе сабой аднапавярховы будынак з амаль квадратнымі вокнамі. Уваход цэнтральнага фасада вылучаны невялікім порцікам на 2 парах стройных калон і 2 невялікімі рызалітамі па баках будынка. Над порцікам узвышаецца паўкруглы фігурны шчыток з невялікім акенцам. Даволі імпазантны выгляд мае тыльны фасад палаца, у цэнтры якога выступае 5-восевы рызаліт на 6 масіўных калонах з дарыйскімі капітэлямі, над якімі ўзвышаецца трохвугольны гладкі франтон. Архітэктурны дэкор абодвух фасадаў мае амаль аднолькавы характар. Бакавыя фасады мелі больш просты выгляд. На левым бакавым фасадзе меўся невялікі ганак на 2 калонах. Пасля апошняй вайны па баках асноўнага аб'ёму зроблены прыбудовы. Увесь будынак акружаў прафіляваны карніз. Палац быў накрыты гладкім чатырохсхільным жалезным дахам, меў 2 пары высокіх комінаў. Унутраная планіроўка будынка сёння значна зменена. Вядома толькі, што ў вялікай зале палаца стаяла вельмі прыгожая старадаўняя мэбля, якая была разрабавана яшчэ ў Першую сусветную вайну. Перад палацам знаходзіўся вялікі газон, а праз яго да параднага ўваходу вялі шырокія прысады, абсаджаныя жывой загараддзю з розных парод кустоў. У парку мелася некалькі прагулачных ліпавых і грабавых прысад. Да сённяшняга дня каля палаца захавалася некалькі лістоўніц.
г. Івацэвічы, вул. Талочкі, комплекс раённай бальніцы
Сядзіба Юндзілаў
Сядзіба Юндзілаў
Сядзіба Юндзілаў
Сядзіба Юндзілаў
Сядзіба Юндзілаў
Сядзіба Юндзілаў
Сядзіба Юндзілаў